أدب وشعر

قصيدة ( ألبوم الصور ) بقلم / أيمن نصر

قصيدة ( ألبوم الصور )
بقلم / أيمن نصر
مكتب بورسعيد
***********************
في ألبوم صوري
كتير من الوشوش.
القريب والغريب
واللي عمري ما شفتهوش
الجدع الأصيل
و الخسيس المغشوش.
و شدني من الصور
شكل واحد
ما عرفتهوش.
شكله شبهي
من غير رتوش.
بس كان فرحان
سعيد بشوش.
فيه حاجه تختلف
عن كل الوشوش.
شكله ماسك في الأمل.
واليأس ناوي ما يعرفوش.
مستحيل تضيع
أحلامه على فاشوش.
الطموح عنده سكن
وعمل عشوش.
والمطبات هدها
بميت شاكوش.
مهو كله باين في الصور
من غير رتوش.
سألت صاحب الصوره مين ؟
قالوا إنت !!
قبل مايمشي الزمن
و يغير وشوش.
قلت يبقى دي صورتي أنا
قبل ما تضيع أحلامي
على فاشوش.
و أعرف الدنيا ع الطبيعه
من غير رتوش.
قلبت تاني في الصور
و الوشوش.
شفت ناس كانت بسيطه.
و شفت ناس كانت حويطه.
و ناس تبدو ع السليقه.
وناس عاوزه زمبليطه.
و شفت إصحاب كانوا معايا.
وقت الفلوس كانوا ورايا.
و لما طارت الفلوس.
لقيتني وحدي في المرايا.
و شفت حبايب اتفرقوا .
و شفت اصحاب إتبعزقوا .
و شفت جيران إتبخروا .
و شفت ناس إستهتروا .
لكن السؤال المعضله
ماعرفتلوش.
مين طير الحبايب الزمن ؟
ولا عفركوش؟
وليه أصحاب الطفوله
ما ستنوش ؟
ولبه الحبايب طاروا
و ما عششوش ؟
وليه الأصيل
أبو وش بشوش ؟
مش موجود النهارده
ضمن الوشوش ؟
أصلها مقاديرمكتوبه
على كل الوشوش .
مقسمها ربك أكيد
يعرف اللي مانعرفوش
و شفت كمان شوية صور.
لكن خدت منها كل العبر.
شوفت الخسيس اللي غدر.
وشوفت الأصيل اللي شكر.
و قبل ما اقفل ألبوم الصور.
شكرته جدا ع العبر.
و ع الدروس
اللي إدهاني
من الصور.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
Open chat